НАУРЫЗ - ЖЫЛ БАСЫ🌷

НАУРЫЗ - ЖЫЛ БАСЫ🌷

Қарауылтөбе мектебінде  жыл басы Наурыз мерекесін тойлау барысында математика пән мұғалімі Есеркеева Зульфия апайымыз "Наурыз әже" болып киініп,
мерекенің нышаны болып табылатын наурыз көжені тілек ретінде мектеп ұжымы мен оқушыларына таратып,ақ батасын берді.
Жасы үлкеннен бата алған үлкен-кіші әр сөзін ықыласпен, құлақ түре тыңдады. 
Батаның адам санасына әсер ететін үлкен күші бар. Халық бата жасалған жерде жақсылыққа сеніп, ынтымақ, береке болады деп ырымдайды. 
Бата, ол – дұға. 
Қазақтың бата сөздері – тамыры тереңде жатқан, тарау-тарау халық тарихымен тағдырлас, қиын уақыттың небір талқысына да түссе де, елдің тұрмыс салтында тайға таңба басқандай айқын із қалдырған, бүгінгі күнге жетсе де, тынымсыз талғампаз талай ұрпақ үшін тәлім-тәрбие болған тағылымы мол тамаша мұрамыз. 
 Өйткені жанымызға жұғымды, ой-санамызға нұрлы шуақ сыйлап, сілкіндіріп серпілтетін, марқайтып қанаттандыратын осынау ақыл, нақыл сөздер тәрбиенің бастау бұлағы.  
Халықтың тілек – бата сөздері жас ұрпақты әдепті, сабырлы, зерделі, арлы болып өсуге баулиды, малды – басты, дәулетті – бақытты, кекшіл емес кешірімді болуын тілейді, жерін, елін қорғауға талапты мықты болып ер жетуге тәрбиелейді.  
Бата беру – алғыс айту, ақ ниетін білдіру, ақ тілек тілеу. 
Зульфия апайдың баталары қабыл болып,Әз Наурызымыз құт береке,ырыс әкелсін,ақ мол болсын!